1. കർത്താവേ, കോപത്തോടെ
എന്നെ ശകാരിക്കരുതേ!
ക്രോധത്തോടെ എന്നെ ശിക്ഷിക്കരുതേ!
2. കർത്താവേ, ഞാൻ തളർന്നിരിക്കുന്നു,
എന്നോടു കരുണ തോന്നേണമേ!
കർത്താവേ, എന്റെ അസ്ഥികൾ
ഇളകിയിരിക്കുന്നു;
എന്നെ സുഖപ്പെടുത്തേണമേ!
3. എന്റെ ആത്മാവ് അത്യന്തം
അസ്വസ്ഥമായിരിക്കുന്നു;
കർത്താവേ, ഇനിയും എത്രനാൾ!
4. കർത്താവേ, എന്റെ ജീവൻ
രക്ഷിക്കാൻ വരേണമേ!
അങ്ങയുടെ കാരുണ്യത്താൽ
എന്നെ മോചിപ്പിക്കേണമേ!
5. മൃതരുടെ ലോകത്ത് ആരും
അങ്ങയെ അനുസ്മരിക്കുന്നില്ല;
പാതാളത്തിൽ ആര് അങ്ങയെ സ്തുതിക്കും?
6. കരഞ്ഞു കരഞ്ഞ് ഞാൻ തളർന്നു;
രാത്രിതോറും ഞാൻ കണ്ണീരൊഴുക്കി;
എന്റെ തലയണ കുതിർന്നു;
കണ്ണീരുകൊണ്ട് എന്റെ കിടക്ക നനഞ്ഞു.
7. ദുഃഖം കൊണ്ട് എന്റെ കണ്ണു മങ്ങുന്നു;
ശത്രുക്കൾ നിമിത്തം അതു ക്ഷയിക്കുന്നു.
8. അധർമ്മികളേ, എന്നിൽനിന്ന്
അകന്നുപോകുവിൻ;
കർത്താവ് എന്റെ വിലാപം കേട്ടിരിക്കുന്നു..
9. കർത്താവ് എന്റെ യാചന ശ്രവിക്കുന്നു;
അവിടുന്ന് എന്റെ പ്രാർത്ഥന കൈക്കൊള്ളുന്നു.
10. എന്റെ സകല ശത്രുക്കളും
ലജ്ജിച്ചു പരിഭ്രാന്തരാകും;
അവർ ക്ഷണത്തിൽ അപമാനിതരായി
പിൻവാങ്ങും.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ