1. ദൈവമേ, എന്നെ കാത്തുകൊള്ളേണമേ!
ഞാനങ്ങയിൽ ശരണം വച്ചിരിക്കുന്നു.
2. അവിടുന്നാണ് എന്റെ കർത്താവ്;
അങ്ങിൽ നിന്നല്ലാതെ എനിക്കു നന്മയില്ല
എന്നു ഞാൻ കർത്താവിനോടു പറയും.
3. ലോകം വിശുദ്ധരെന്നു കരുതുന്ന
ദേവന്മാർ നിസ്സാരരാണ്;
അവരിൽ ആനന്ദം കൊള്ളുന്നവർ അഭിശപ്തരാണ്.
4. അന്യദേവന്മാരെ അനുഗമിക്കുന്നവർ
തങ്ങളുടെ ദുരിതം വർദ്ധിപ്പിക്കുന്നു;
ഞാൻ അവർക്കു് രക്തം കൊണ്ട്
പാനീയബലി അർപ്പിക്കുകയില്ല.
ഞാൻ അവരുടെ നാമം ഉച്ചരിക്കുകയില്ല.
5. കർത്താവാണ് എന്റെ ഓഹരിയും പാനപാത്രവും;
എന്റെ ഭാഗധേയം അവിടുത്തെ കരങ്ങളിലാണ്.
6. അഭികാമ്യമായ ദാനമാണ് എനിക്കു്
അളന്നുകിട്ടിയിരിക്കുന്നത്;
വിശിഷ്ടമായ അവകാശം എനിക്കു
ലഭിച്ചിരിക്കുന്നു.
7. എനിക്കു് ഉപദേശം നൽകുന്ന കർത്താവിനെ
ഞാൻ വാഴ്ത്തുന്നു;
രാത്രിയിലും എന്റെ അന്തരംഗത്തിൽ
പ്രബോധനം നിറയുന്നു.
8. കർത്താവ് എപ്പോഴും എന്റെ കൺമുമ്പിലുണ്ട്;
അവിടുന്ന് എന്റെ വലുതുഭാഗത്തുള്ളതുകൊണ്ട്
ഞാൻ കുലുങ്ങുകയില്ല.
9. അതിനാൽ എന്റെ ഹൃദയം സന്തോഷിക്കുകയും
അന്തരംഗം ആനന്ദം കൊള്ളുകയും ചെയ്യുന്നു.
എന്റെ ശരീരം സുരക്ഷിതമായി വിശ്രമിക്കുന്നു.
19. അവിടുന്ന് എന്നെ പാതാളത്തിൽ തള്ളുകയില്ല;
അങ്ങയുടെ പരിശുദ്ധൻ ജീർണ്ണിക്കാൻ
അനുവദിക്കുകയില്ല.
11. അങ്ങ് എനിക്കു് ജീവന്റെ മാർഗ്ഗം
കാണിച്ചുതരുന്നു;
അങ്ങയുടെ സന്നിധിയിൽ ആനന്ദത്തിന്റെ
പൂർണ്ണതയുണ്ട്;
അങ്ങയുടെ വലുതുകൈയിൽ
ശാശ്വതമായ സന്തോഷമുണ്ട്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ