1. കർത്താവേ, എനിക്കു ന്യായം
സ്ഥാപിച്ചുതരേണമേ!
എന്തെന്നാൽ ഞാൻ നിഷ്ക്കളങ്കനായി ജീവിച്ചു;
ചാഞ്ചല്യമില്ലാതെ ഞാൻ കർത്താവിൽ
ആശ്രയിച്ചു.
2. കർത്താവേ, എന്നെ പരിശോധിക്കുകയും
പരീക്ഷിക്കുകയും ചെയ്യുക;
എന്റെ ഹൃദയവും മനസ്സും
ഉരച്ചുനോക്കുക.
3. അങ്ങയുടെ കാരുണ്യം എന്റെ കൺമുമ്പിലുണ്ട്;
അങ്ങയുടെ സത്യത്തിൽ ഞാൻ വ്യാപരിച്ചു.
4. കപടഹൃദയരോടു ഞാൻ സഹവസിച്ചിട്ടില്ല;
വഞ്ചകരോടു ഞാൻ കൂട്ടുകൂടിയിട്ടില്ല.
5. ദുഷ്ക്കർമ്മികളുടെ സമ്പർക്കം
ഞാൻ വെറുക്കുന്നു;
നീചന്മാരോടുകൂടി ഞാൻ ഇരിക്കുകയില്ല.
6. കർത്താവേ, നിഷ്ക്കളങ്കതയിൽ ഞാൻ
എന്റെ കൈ കഴുകുന്നു;
ഞാൻ അങ്ങയുടെ ബലിപീഠത്തിനു
പ്രദക്ഷിണം വയ്ക്കുന്നു.
7. ഞാൻ ഉച്ചത്തിൽ കൃതജ്ഞതാസ്തോത്രം
ആലപിക്കുന്നു;
അവിടുത്തെ അത്ഭുതകരമായ സകല
പ്രവൃത്തികളെയും ഞാൻ പ്രഘോഷിക്കുന്നു.
8. കർത്താവേ, അങ്ങു വസിക്കുന്ന ആലയവും
അങ്ങയുടെ മഹത്വത്തിന്റെ ഇരിപ്പിടവും
എനിക്കു പ്രിയങ്കരമാണ്.
9. പാപികളോടുകൂടെ എന്റെ ജീവനെ
തൂത്തെറിയരുതേ!
രക്തദാഹികളോടുകൂടെ എന്റെ പ്രാണനെയും.
10. അവരുടെ കൈകളിൽ കുതന്ത്രങ്ങളാണ്;
അവരുടെ വലതുകൈ കോഴ കൊണ്ട്
നിറഞ്ഞിരിക്കുന്നു.
11. ഞാനോ നിഷ്ക്കളങ്കതയിൽ വ്യാപരിക്കുന്നു;
എന്നെ രക്ഷിക്കുകയും എന്നോടു കരുണ
കാണിക്കുകയും ചെയ്യണമേ!
12. നിരപ്പായ ഭൂമിയിൽ ഞാൻ നിലയുറപ്പിച്ചിരിക്കുന്നു;
മഹാസഭയിൽ ഞാൻ കർത്താവിനെ വാഴ്ത്തും
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ