നാളെയെച്ചൊല്ലി അഹങ്കരിക്കേണ്ട

നാളെയെച്ചൊല്ലി അഹങ്കരിക്കേണ്ട;
ഒരുദിവസം കൊണ്ട് എന്തു സംഭവിക്കാമെന്ന്
           നീ അറിയുന്നില്ല.
ആത്മപ്രശംസ ചെയ്യരുത്,
മറ്റുള്ളവർ നിന്നെ പ്രശംസിക്കട്ടെ;
അന്യന്റെ നാവാണ്, നിന്റേതല്ല
       അതു ചെയ്യേണ്ടത്.
കല്ലിനു ഭാരമുണ്ട്; മണലിനും ഭാരമുണ്ട്;
എന്നാൽ, ഭോഷന്റെ പ്രകോപനം
     ഇവ രണ്ടിനെയുംകാൾ ഭാരമുള്ളതത്രേ.

ക്രോധം ക്രൂരമാണ്; കോപം
      അനിയന്ത്രിതമാണ്;
എന്നാൽ അസൂയയെ നേരിടാൻ
     ആർക്കാണു കഴിയുക?
തുറന്ന കുറ്റപ്പെടുത്തലാണ് നിഗൂഡമായ
        സ്നേഹത്തെക്കാൾ മെച്ചം;
സ്നേഹിതൻ മുറിപ്പെടുത്തുന്നത് ആത്മാർത്ഥത
                  നിമിത്തമാണ്;
ശത്രുവാകട്ടെ നിന്നെ തെരുതെരെ
     ചുംബിക്കുക മാത്രം ചെയ്യുന്നു.
ഉണ്ടു നിറഞ്ഞവനു തേൻ പോലും
           മടുപ്പുളവാക്കുന്നു;
വിശക്കുന്നവന് കയ്പും മധുരമായി തോന്നുന്നു.

(സുഭാഷിതങ്ങൾ 27: 1 - 7)