സർവ്വരേയും വിധിക്കുന്ന
സർവ്വസൃഷ്ടിസ്ഥിതിനാഥാ
സർവ്വനീചനവൻ നിന്നെ വിധിച്ചോ പുത്രാ !
കാരണം കൂടാതെ നിന്നെ
കൊലചെയ്യാൻ വൈരിവൃന്ദം
കാരിയക്കാരുടെ പക്കൽ കൊടുത്തോ പുത്രാ !
പിന്നെ ഹേറോദേസു പക്കൽ,
നിന്നെയവർ കൊണ്ടുചെന്നു
നിന്ദചെയ്തു പരിഹസിച്ചയച്ചോ പുത്രാ !
പിന്നെയധികാരിപക്കൽ
നിന്നെയവൻ കൊണ്ടുചെന്നു
നിന്നെയാക്ഷേപിച്ചു കുറ്റം പറഞ്ഞോ പുത്രാ !
എങ്കിലും നീയൊരുത്തർക്കും
സങ്കടം ചെയ്തില്ല നൂനം
നിങ്കലിത്ര വൈരമിവർക്കെന്തിതു പുത്രാ !
പ്രാണനുള്ളോനെന്നു ചിത്തേ
സ്മരിക്കാതെ വൈരമോടെ
തൂണുതന്മേൽ കെട്ടിനിന്നെയടിച്ചോ പുത്രാ !
ആളുമാറി അടിച്ചയ്യോ
ധൂളി നിന്റെ ദേഹമെല്ലാം
ചീളുപെട്ടു മുറിഞ്ഞു നീ വലഞ്ഞോ പുത്രാ !
ഉള്ളിലുള്ള വൈരമോടെ
യൂദർ നിന്റെ തലയിന്മേൽ
മുള്ളുകൊണ്ടു മുടിവച്ചു തറച്ചോ പുത്രാ !
തലയെല്ലാം മുറിഞ്ഞയ്യോ
ഒലിക്കുന്ന ചോരകണ്ടാൽ
അലസിയെന്നുള്ളിലെന്തു പറവൂ പുത്രാ !
തലതൊട്ടങ്ങടിയോളം
തൊലിയില്ല മുറിവയ്യോ
പുലിപോലെ നിന്റെ ദേഹം മുറിച്ചോ പുത്രാ !
നിൻതിരുമേനിയിൻ ചോര
കുടിപ്പാനാ വൈരികൾക്ക്
എന്തുകൊണ്ടു ദാഹമിത്ര വളർന്നു പുത്രാ !
